परिचय

भूगोल र जीवनशैलीमा आधुनिक विश्वव्यापीकरणको विशाल प्रक्रियामा समाहित हुने क्रम तीव्र छ । समाज रूपान्तरणको तीव्र वेगमा मौलिक परम्परा र संस्कृतिहरूले पनि आधुनिकताभित्र मौलिकताका मिश्रित स्वरूप ग्रहण गर्नु अस्वाभाविक पनि होइन । समाज उपभोगवादी संस्कृति र अभ्यासमा मौलाउनु अधिनस्त समाजको विशेषता हो । समाजले गहण गरेका विशेषताहरूसँग आफ्ना मौलिक पहिचान, संस्कृति र अभ्यासहरूलाई जीवन्त राख्ने चुनौती हामीसँग छ ।
जीवन जीउनका खातिर मानिस एक ठाउँबाट अर्को ठाउँसम्म बसाइँ सरेर गइरहेका छन् । उनीहरूसँगै उनीहरूको पहिचान सामाजिक–सांस्कृतिक क्रियाकलापका अभ्यासहरू अन्तरसम्बन्धको रूपमा गइरहेको नै छ । स्वयम् आफ्नो पहिचान र सामूहिक भावनालाई धानिरहेका रहेका छन् मान्छेहरू ।
यसरी नै आफ्ना सांस्कृतिक अभ्यासहरूलाई एकत्रित गरी आफ्नो अस्तित्व र मौलिकतालाई जीवन्त राख्ने, सांस्कृतिक–सामाजिक अभ्यासहरूको भोगचलन गर्ने र ‘आफू हुनु’को बोध गर्ने गरी ऐतिहासिक–सामाजिक–सांस्कृतिक अभ्यासका धरातलहरूलाई गहन, विस्तृत र सूक्ष्म रूपमा अध्ययन गरी एकवद्ध बनाउने प्रयास स्वरूप तिमिल्सिना समाज नेपालको स्थापना भएको हो ।